Ifaranga rya Nigeria (naira), irya Malawi (kwacha) hamwe n’ifaranga y’u Rwanda (RWF) yashyizwe ku rutonde rw’amafaranga ya Afurika yitwaye nabi kurusha ayandi imbere y’amadorari ya Amerika mu 2024, nk’uko raporo iheruka kubigaragaza, kubera ko yahuye n’ibibazo byinshi, uhereye ku busumbane bukabije mu bucuruzi, izamuka rikabije ry’ibiciro, kugabanuka kw’amafaranga y’amahanga.
Izindi nzitizi ifaranga rya Afurika rihura nazo kugirango ifaranga ntirikomeze guta agaciro zirimo imyenda myinshi ndetse n’ihungabana muri politiki.
Ibi bibazo bibangamira imbaraga zo kugera ku iterambere rirambye ry’ivunjisha.
Igipimo cy’ivunjisha kigira ingaruka zikomeye ku izamuka ry’ibiciro mu gihugu n’ubushobozi bwo guhaha kw’ifaranga ryacyo.
Guta agaciro gukabije bishobora gutera kuzamura igiciro cy’ibicuruzwa na serivisi bitumizwa mu mahanga, bigashyira igitutu ku baguzi no ku bukungu.
Kugeza ku itariki ya 1 Kanama 2023, imibare ya Statista yerekanye imikorere y’ifaranga ritandukanye rya Afurika imbere y’amadorari ya Amerika.
Imiterere y’idolari ry’Amerika nk’ifaranga rya reserve, uruhare rwaryo mu bucuruzi mpuzamahanga, hamwe n’ubukungu bwa Amerika bihagaze neza bituma rikomeza kuba ifaranga rishakwa cyane mu kuvunjisha ku Isi.
Leone rya Sierra Leone ryari rifite igipimo cyo hejuru kurusha andi mu kuvunjisha, aho idolari rimwe rihwanye na 21.021.7, byerekana ko ari ryo faranga rifite agaciro ko hasi ugereranyije n’andi ku mugabane.
Rikurikirwa n’irya Guinea aho ushaka idorali rimwe atanga 8.521 n’irya Madagascar (Malagasy Ariary) utanga 4.430 kugirango ubone idorali rimwe.
Imibare kandi yerekanaga ko idorari rimwe ryari rihwanye na 758.9 Naira ya Nigeria, 824 Kwanza rya Angola, Ama-Pound 599 ya Sudani, 185 $ yo muri Liberia, Ama-Dinar 4.77 Libya, Ama-Cedi 11 yo muri Ghana n’Ama-Pound 30.85 ya Misiri byerekana itandukaniro ry’imbaraga z’ifaranga ku mugabane wa Afurika.
Vuba aha, ibihugu bimwe byatsinze igitutu cyo guta agaciro kw’ifaranga, bishimangira amafaranga yabyo, mu gihe ibindi byahuye n’imihindagurikire ikabije ndetse amafaranga yabyo akomeza guta agaciro mu ivunjisha.
Guverineri wa Banki Nkuru y’u Rwanda, John Rwangombwa, ubwo yari mu Nteko Ishinga Amategeko tariki 18 Ugushyingo 2024, yavuze ko ibintu bikomeje guhenda ku masoko cyane cyane ibiribwa, bitewe n’impamvu zitandukanye zirimo imihindagurikire y’ibihe iteza abahinzi kubura umusaruro, hamwe no kuba u Rwanda rugura ibintu byinshi hanze kurusha ibyo rwoherezayo.
Guverineri Rwangombwa yagize ati “Mu mwaka ushize wa 2023 habayeho ikibazo cy’amapfa bitera ibura ry’ibiribwa, biba ngombwa ko hatumizwa ibiribwa byinshi aho twatanze miliyoni 600 z’Amadolari ku biribwa gusa, igisubizo kiri mu kongera ibyoherezwa hanze n’ibikorerwa mu Gihugu, mu gihe gito birabangamye ariko mu gihe kirekire aho ni ho hari igisubizo.”
Umuyobozi Mukuru w’Ikigo gishinzwe amasoko ya Leta mu Rwanda (RPPA), Joyeuse Uwingeneye, ubwo yari mu nama y’ibigo bishinzwe amasoko ya Leta muri Afurika, yavuze ko batangiye gutanga amasoko bibanze ku kugura ibikorerwa imbere mu Gihugu, kugira ngo barinde ifaranga ry’u Rwanda gukomeza gatakariza agaciro mu kugura ibintu bivuye hanze.
Imbonerahamwe ikurikira iragereranya igipimo cy’ivunjisha ry’ifaranga ryari ryifashe nabi cyane mu 2023 kugeza kuwa 31 Ukuboza 2024;
