Liz Cambage, umwe mu bakinnyi b’imena b’umupira w’amaboko w’abagore ku isi yongeye kugaruka mu itangazamakuru mu buryo budasanzwe nyuma y’uko aretse gukina akajya gucuruza ubwambure bwe kuri murandasi.
Uyu mukobwa wahoze akina muri shampiyona ya WNBA muri Leta Zunze Ubumwe za Amerika yemeje ko amafaranga yinjije mu cyumweru cya mbere ajya kuri OnlyFans urubuga rucuruza amashusho y’urukozasoni yasumbaga ayo yinjije mu gihe cyose yamaze akina muri WNBA.
Nyuma yo gusezera ku gukina mu 2022, Cambage yavuze ko yafashe iki cyemezo kugira ngo yibande ku buzima bwe bwite no kwiyubaka. Ati: “Nari nkeneye umwanya wo gukira no kwisanga,”
Ku mpuzandengo, uyu mukinnyi w’Umunya-Australia yatsindaga amanota 15.8 kandi akagarura imipira 7.5 ku mukino muri WNBA akaba yari umwe mu bakinnyi bahembwaga neza aho yahabwaga $221,450 ku mwaka.
Nyuma yo gufata umwanzuro wo kuva mu kibuga, Cambage yinjiriye OnlyFans nk’uburyo bwo kugaragaza urundi ruhande rw’imibereho ye.
Yavuze ko iki cyemezo cyari kigamije kumufasha gusangiza abakunzi be ishusho nshya y’ubuzima bwe. Yagize ati: “Umupira w’amaboko wari igice kinini cy’ubuzima bwanjye, ariko ntabwo ari byo byose bingize. Nashakaga kubaho no kugaragaza uwo ndi we mu buryo budasanzwe.”
Cambage yavuze ko ayo yinjije ku rubuga rwa OnlyFans mu gihe gito agaragaza uburyo abagore bahura n’imbogamizi mu guhembwa agatubutse mu mikino. Yagize ati: “Birababaje kubona ko mu cyumweru kimwe gusa ninjije menshi kurusha ayo nakuye mu myaka myinshi nkina muri WNBA.”
