Rayon Sports yitwaye neza mu mikino ibanza ya 1/8 cy’Igikombe cy’Amahoro, itsindira Rutsiro FC iwayo, mu gihe APR FC na Police FC zitashoboye kubona intsinzi.
Ku mukino wabereye kuri Stade Umuganda, Rayon Sports yatsinze Rutsiro FC ibitego 2-1.
Igitego cya mbere cyatsinzwe ku munota wa 23 na Adama Bagayoko nyuma y’umupira mwiza yahawe na Fall Ngagne.
Ku munota wa 60, Youssou Diagne yatsinze igitego cya kabiri cya Rayon, naho Rutsiro FC igabanya ikinyuranyo ku munota wa 84 binyuze kuri Jonas. Gikundiro yacunze neza intsinzi kugeza umukino urangiye.
I Musanze, APR FC yanganyije na Musanze FC 0-0 mu mukino utaranzwe n’ibitego. Police FC yo yahuye n’akaga itsindirwa i Nyanza na Nyanza FC ibitego 2-1.
Mu yindi mikino, City Boys FC yo mu cyiciro cya kabiri yanganyije na Gorilla FC yo mu cyiciro cya mbere 1-1, mu gihe Gasogi United yatsinze AS Muhanga ibitego 2-0. Amagaju FC yatsinze Bugesera FC ibitego 2-1.
Indi mikino yabaye mbere yagaragayemo AS Kigali itsinda Vision FC ibitego 2-1, naho Mukura VS itsinda Intare FC igitego 1-0.
Iyi mikino y’Igikombe cy’Amahoro yakomeje kwerekana ubukana bw’amakipe atandukanye, aho Rayon Sports ikomeje kwerekana imbaraga, mu gihe APR FC na Police FC zitarabasha gutanga umusaruro ukwiye.
