Umukinnyi w’umupira w’amaguru wo muri Leta Zunze Ubumwe za Amerika, Megan Rapinoe, yanenze Perezida Donald Trump ku cyemezo yafashe cyo gukumira abakinnyi bahinduje igitsina gukina mu marushanwa y’abagore.
Mu kiganiro yagiranye n’ikinyamakuru MUNDIAL, Rapinoe wahoze ari kapiteni wa Team USA yavuze ko ibyo Trump yakoze atari ugushyigikira abagore nk’uko abivuga.
“Ntukambwire ngo ibi bijyanye no kurengera uburenganzira bw’abakinnyi b’abagore,” Rapinoe w’imyaka 39, wigeze kwegukana igihembo cya Ballon d’Or y’abagore, yongeyeho ati: “Ibyo ni uburyo bwo kubeshya no kuyobya uburari.”
Perezida Trump amaze gutorwa yongeye gushyiraho amategeko ategeka ko Leta yemera gusa igitsina umuntu yavukanye. Yanashyizeho itegeko rishya ryiswe “Keeping Men Out of Women’s Sports,” rigamije gukumira abakinnyi bihinduje igitsina gukina mu marushanwa y’abagore.
Iryo tegeko riteganya ko amashuri na kaminuza zemera abakinnyi bihinduje igitsina mu marushanwa y’abagore zizahagarikirwa inkunga ya Leta. Nyuma y’iri tegeko, Ishyirahamwe ry’imikino ya kaminuza muri Amerika (NCAA) ryahinduye politiki yaryo, risaba ko abakinnyi bemererwa gukina mu marushanwa y’abagore ari abavutse ari abagore.
Perezida Trump yavuze ko iri tegeko rigamije kurengera amahirwe y’abagore n’abakobwa mu mukino, ariko Rapinoe abona ko ari uburyo bwo guhohotera abaryamana n’abo bahuje igitsina ndetse n’abihinduje igitsina.
“Ndabona ari ubugome bukabije,” Rapinoe yakomeje ati: “Niba urebye neza, ibi ni ubugome n’ukugira umutima mubi. Iki si ikibazo gikomeye, kandi ntibishoboka ko umuntu yirukana uwihinduje igitsina abinyujije mu mategeko.”
Yongeyeho ati: “Tumaze imyaka irenga icumi turwana kugira ngo habeho uburenganzira bungana kuri bose no gukuraho ivangura. Abantu bakwiye kureka gutesha agaciro imikino y’abagore.”
