Abatuye mu Murenge wa Gishari bavuga ko bahangayikishijwe cyane n’ikibazo cy’umutekano muke baterwa n’urugomo rukorwa n’insoresore zabaswe n’ubusinzi ndetse n’ibiyobyabwenge.
Umwe mu baturage yagize ati “ Mu Murenge wacu wa Gishari tugira umutekano muke kuko nko mu minsi mike ishize hari umusore bateze baramukubita baramukomeretsa ajyanwa mu bitaro, nkatwe ducuruza tuba tuzi neza ko amahirwe menshi ari ukwibwa mu gihe dutashye”.
Undi muturage ati ” Iyo muhuye basinze, izo nsoresore zihita zikwanjama zikaguhondagura ubundi zikagucucura utwawe ugasigara amara masa. Akenshi babiterwa nuko badakura amaboko mu mifuka noneho ayo kunywera inzoga bakayakura mu baturage bambuye”.
Umunyamabanga Nshingwabikorwa w’Umurenge wa Gishari, NTWARI Emmanuel aganira na BTN TV, yemeje ko ubuyobozi butazihanganira ababuza umudendezo abaturage.
Yagize ati” Ikibazo cy’umutekano muke mu Murenge wa Gishari twaragihagurukiye cyane kuko ababibikora ndetse n’abakekwagaho kuwuhungabanya barafashwe. ntituzihanganira uwo ariwe wese ushaka guhungabana umutekano w’abaturage ndetse ababikora nibakure amaboko mu mifuka bakore kuko umurimo ugufasha byinshi. rero turizeza abaturage umutekano usesuye, baryamye batuze kandi twese dufatanye kuwubungabunga.”
Abatuye uwo Murenge bavuga ko mu masaha y’umugoroba ntawutinyuka kuva mu rugo yitwaje ikintu gifite agaciro kuko ahita acyamburwa yashaka no kwihagararaho agagukubitwa agahindurwa intere.
