Nyinawumuntu Grace, umutoza ukomeye mu mupira w’amaguru w’abagore mu Rwanda yerekeje muri Canada mu ikipe ya Ottawa Gloucester Hornets, aho azakomeza gufasha abana bafite impano muri ruhago.
Uyu mutoza yari amaze imyaka itatu ayobora tekinike mu Irerero rya Paris Saint-Germain riherereye i Huye. Mbere yaho, yabaye umukinnyi wa AS Kigali WFC ndetse anayibera umutoza, aho yayifashije gutwara Igikombe cya Shampiyona inshuro umunani.
Mu gihe yari mu Irerero rya PSG, Nyinawumuntu yegukanye Igikombe cy’Isi cy’amarero ya PSG inshuro eshatu, ndetse mu 2013 atorwa nk’umutoza mwiza w’umwaka.
Kuri ubu, agiye gukomeza gufasha abana b’abahungu n’abakobwa bafite hagati y’imyaka itanu na 18 mu ikipe ya Ottawa Gloucester Hornets.
