Myugariro w’ikipe ya Rayon Sports, Omborenga Fitina yandikiye ubuyobozi bw’iyo kipe abumenyesha ko ashaka gusesa amasezerano yari afitanye nayo. Ibaruwa yandikiwe Bwana Twagirayezu Thadée, umuyobozi wa Rayon Sports, isobanura ko impamvu nyamukuru ari ukutubahiriza ibikubiye mu masezerano.
Mu ibaruwa ye, Omborenga agaragaza ko hari ibyo bumvikanye bitubahirijwe birimo no kutamuha amafaranga yiswe “recruitment fee”, ndetse no kutamuhemba ku gihe. Ati: “Kubwumvikane kubera ko mutubahirije ibikubiye muri contrat, harimo kutampa recruitment yanjye yasigaye no kutampembera ku gihe.”
Uyu mukinnyi wahoze akinira ikipe ya APR FC yaje muri Rayon Sports mu mwaka ushize, akaba yari yitezweho kongerera ikipe ubunararibonye n’ubwugarizi bukomeye.
Kugeza ubu, ubuyobozi bwa Rayon Sports ntiburagira icyo butangaza ku ibaruwa ye.
