Umukinnyi mpuzamahanga w’umunyarwanda, Bryan Clovis Ngwabije yasinye amasezerano y’umwaka umwe mu ikipe ya FC Dieppe, iherutse kuzamuka mu cyiciro cya kane mu mupira w’amaguru mu Bufaransa.
Ngwabije w’imyaka 26 yakiniraga Blois Foot 41, aho yagaragaye mu mikino 25 y’amarushanwa ya shampiyona muri uyu mwaka w’imikino. Iyo kipe ye yarangije ku mwanya wa 6 n’amanota 40.
Uyu myugariro muremure ategerejweho gufasha FC Dieppe kugira ubwugarizi bukomeye, mu gihe iyi kipe izaba ishaka kwitwara neza muri shampiyona nshya izaba irimo.
Ngwabije yatangiriye gukina muri Olympique Lyonnais mu makipe y’abatarengeje imyaka 19, nyuma aza gukinira andi makipe arimo Andrézieux, Guingamp, SC Lyon, na Blois Foot 41.
Ku rwego mpuzamahanga, Bryan Ngwabije yambaye bwa mbere umwambaro w’ikipe y’igihugu y’u Rwanda tariki ya 4 Kamena 2021. Kuri ubu, yongeye guhamagarwa mu ikipe ya Adel Amrouche izakina umukino wa gicuti na Algeria i Brida tariki ya 9 Kamena. Kuri ubu amaze guhamagarwa inshuro enye.
