U Rwanda ku wa Gatanu tariki ya 13 Kamena, rwashyikirijwe inshingano zo kuyobora Umuryango Ushinzwe Kurwanya Ikwirakwizwa ritemewe ry’Intwaro nto muri Afurika (RECSA).
Ni inshingano u Rwanda rwafatiye mu nama ya 11 y’abaminisitiri b’ibihugu bigize uriya muryango yabereye i Nairobi muri Kenya.
Zakiriwe na Minisitiri w’Umutekano w’Imbere mu gihugu, Dr. Vincent Biruta washyikirijwe ibendera ry’uriya muryango ndetse n’ibindi bikoresho byawo na mugenzi we wa Kenya, Kipchumba Murkomen.
U Rwanda rwafashe inshingano zo kuyobora RECSA ruzisimbuyeho Kenya. Rugomba zungirizwaho na Tanzania.
Minisitiri w’Ububanyi n’Amahanga ndetse n’Ubutwererane, Amb. Olivier Nduhungirehe, yatangaje ko mbere y’uko u Rwanda ruhabwa inshingano zo kuyobora uriya muryango Repubulika Iharanira Demokarasi ya Congo yagerageje kurwitambika ngo rutazihabwa, gusa biba iby’ubusa.
Yanditse ku rubuga rwe rwa X ati: “Ni ngombwa kumenya ko RDC yongeye kwinuba igerageza kurwanya ko u Rwanda ruyobora RECSA. Ku bw’amahirwe, imiryango yose yo muri Afurika ntishobora guterwa ubwoba cyangwa kugirwa igikoresho n’ubutegetsi bwihebye bwa Kinshasa”.
RDC yagerageje kwitambika u Rwanda ngo rutayobora uriya muryango, nyuma y’uko mu cyumweru gishize na bwo yari yabikoze igatuma rwima inshingano zo kuyobora Umuryango w’Ubukungu bw’Ibihugu byo muri Afurika yo Hagati (CEEAC) nyamara ari rwo rwari rutahiwe.
Ni igikorwa cyababaje u Rwanda, runahita rufata icyemezo cyo kuva muri uriya muryango rwashinje kugirwa igikoresho na RDC ibifashijwemo na bimwe mu bihugu biwugize.
