Nyuma y’amasaha make Minisiteri y’Ubuzima itangaje ko amashuri na kaminuza bya leta n’ibyigenga bifunga imiryango kuri uyu wa 16 Werurwe 2020 mu rwego rwo gukumira icyorezo cya Koronavirusi, Minisiteri y’Uburezi yiyemeje kwishyura amafaranga y’indendo zo gucyura abanyeshuri.
Ibi bigaragara mu itangazo iyi Minisiteri yashyize ahagaragara, rishyiraho uburyo abanyeshuri biga mu bigo by’amashuri bibacumbikiye bazataha.
MINEDUC ivuga ko abanyeshuri biga mu Ntara y’Amajyepfo n’Umugi wa Kigali bataha kuri uyu wa 15 Werurwe 2020, mu gihe kuri uyu wa mbere tariki ya 16 Werurwe hataha abiga mu Ntara y’Amajyaruguru, iy’Iburasirazuba n’Iburengerazuba.
MINEDUC irasaba abashinzwe uburezi mu mirenge no mu turere, inzego zishinzwe umutekano n’abayobozi b’ibigo bitwara abagenzi gukurikirana no gufasha iyubahirizwa ry’iyi gahunda, hakimakazwa isuku nk’uko Minisiteri y’Ubuzima yabitanze mu mabwiriza.
Abanyeshuri bakomeza mu Ntara banyuze mu Mugi wa Kigali, barahabwa ubufasha bwo kubona imodoka zibageza mu turere twabo. Abayobozi b’ibigo by’amashuri nabo barasabwa guhumuriza abanyeshuri.
Icyitonderwa:
Mu rwego rwo gukumira iki cyorezo, Minisiteri y’Ubuzima isaba umuntu wese ufite ibimenyetso bisanzwe bya Koronavirusi (nk’inkorora n’umuriro) ko yaguma mu rugo, agahamagara umurongo utishyurwa wa 114 cyangwa akamenyesha Umujyanama w’Ubuzima umwegereye kugira ngo ahabwe amabwiriza n’ubufasha.
