Impuzamashyirahamwe y’umupira w’amaguru muri Afurika y’Iburasirazuba n’iyo hagati (CECAFA), yashyize ahagaragara urutonde rw’amakipe 12 azitabira irushanwa rya Cecafa Kagame Cup 2025, rizabera i Dar es Salaam muri Tanzania guhera ku wa 2 kugeza ku wa 5 Nzeri 2025.
U Rwanda ruzahagararirwa na APR FC, ari na yo yegukanye shampiyona iheruka mu gihugu.
Andi makipe azitabira ni:
Vipers SC (Uganda), El Merriekh SC Bentiu (Sudani y’Epfo), Mlandege SC (Zanzibar), Al Hilal (Sudani), Police FC (Kenya), Ethiopia Insurance (Ethiopia), MCC FC (Somalia), Aigle Noir FC (Burundi), Young Africans SC na Simba SC (Tanzania), ASAS Djibouti Telecom (Djibouti)
Nubwo Simba SC itatwaye shampiyona ya Tanzania, yahawe umwanya kuko igihugu cyayo ari cyo kizakira iri rushanwa.
Umuyobozi wa CECAFA, Auka Gecheo, yavuze ko iri rushanwa rizaba ari n’amahirwe yo kwitegura imikino ya CAF 2025/2026, bikaba bizatuma irushanwa riba rikomeye.
Ku nshuro iheruka, Red Arrows yo muri Zambia ni yo yegukanye igikombe itsinze APR FC ku mukino wa nyuma.
