Polisi yo muri Espagne yataye muri yombi umugabo ukekwaho gutwika café iherereye mu mujyi wa Los Palacios y Villafranca mu ntara ya Sevilla, nyuma y’uko abakozi b’iyo café banze kumushyirira mayonnaise mu mugati.
Amashusho yafashwe na camera z’umutekano yerekanye uwo mugabo usanzwe ari uwo mu ntara ya Cordoba, asuka lisansi ku meza maze aratwika. Ibyo byateje inkongi ikomeye yahungabanyije abakiriya barimo abana n’abakuze, ariko ku bw’amahirwe nta muntu n’umwe wahasize ubuzima.
Umuyobozi wa café Las Postas, Jose Antonio Caballero, yavuze ko ibintu byabaye “nk’inzozi mbi zidashoboka.”
Yagize ati: “Umukozi umwe yamusobanuriye ko tutagira igikoni, ko umugati uzanwa uko uri. Nyuma y’aho yahise ajya kugura lisansi ku iduka riri hafi, agaruka ayifite mu icupa, maze asubira kubaza: ‘Muremeza ko koko nta mayonnaise mufite?’ mbere y’uko acana umuriro.”
Mu gihe yacanaga umuriro, uwo mugabo ubwe yafashwe n’inkongi ku kuboko kw’ibumoso, agerageza kuyizimya akoresheje ukundi kuboko. Abashinzwe umutekano bahise bahagera, bamuta muri yombi, banamujyana ku ivuriro kugira ngo avurwe ibikomere by’inkongi.
Abategetsi bavuze ko ibyo bikorwa byangije ibikoresho bya café bifite agaciro kabarirwa hagati ya €6,000 na €7,000.
Uyu mugabo w’imyaka 50 ubu afunzwe n’urwego rwa polisi rwa Guardia Civil, kandi biteganyijwe ko azagezwa imbere y’urukiko kuri uyu wa gatanu, tariki ya 22 Kanama 2025.
