Minisiteri y’Ubuzima muri Tanzania yatangaje ukwiyongera gukabije kw’abantu bagaragaye icyorezo cya Coronavirus (Covid-19), aho ibipimo byafashwe tariki ya 14 n’iya 15 Mata 2020 byagaragaje abarwayi bashya 35.
Imibare iheruka yagaragaje ko iki gihugu cyari kimaze kugaragaramo abanduye 53. Imibare dukomora mu itangazo ry’iyi Minisiteri igaragaza ko aba barwayi bashya bose bafite ubwenegihugu bwa Tanzania, 26 ari bo muri Dar es Salaam, 2 bo muri Mwanza, 1 wo muri Kilimandjaro na 6 bo muri Zanzibar.
Hamaze kwemezwa igiteranyo cy’abagaragayeho iki cyorezo 88, abamaze gukira ni 11, bane barapfuye.
Tanzania iri mu bihugu bike bitarafata ingamba zikakaye zo kwirinda ikwirakwira rya Covid-19, aho usanga ibikorwa by’imbere mu gihugu byarakomeje ariko hubahirizwa amabwiriza yo kwirinda.
Mu ngamba zafashwe mu bihugu bitanukanye harimo guhagarika gusengera mu mbaga, insengero zirafungwa ariko Perezida w’iki gihugu, John Pombe Magufuli we avuga ko atazigera afunga insengero, kiliziya n’imisigiti kuko ari ho hari Imana izabafasha gutsinda iki cyorezo.
Iri zamuka ry’umubare w’abanduye Covid-19 muri Tanzania ryateye kwibaza niba ubuyobozi bw’iki gihugu budafata ingamba zo guhagarika ibikorwa byatuma ikwirakwira ry’iki cyorezo rihagarara.
