Komanda w’Akarere ka mbere ka Gisirikare ka FARDC, Gen. Major Chiko Tshintambwe, ari i Kikwit, umurwa mukuru w’Intara ya Kwilu, kuva ku Cyumweru, itariki ya 14 Nzeri 2025, mu butumwa bwo kugenzura no kuganira n’abasirikare bagira uruhare mu guhiga inyeshyamba za Mobondo.
Nk’uko byatangajwe na Capt. Antony Mwalushay, Umuvugizi w’ibikorwa bya Ngemba, ngo uruzinduko rw’uyu musirikare mukuru muri zone ruri mu rwego rwo gukurikirana ibikorwa bya gisirikare bikomeje gukorerwa muri aka karere.
Capt. Antony Mwalushay yasobanuye ko mu gihe azaba ari muri uyu mujyi uherereye mu majyepfo y’iburengerazuba bw’igihugu, Gen. Chiko Tshintambwe azasuzuma ibikorwa bya gisirikare byo kurwanya umutwe witwara gisirikare wa Mobondo muri Teritwari ya Kwamouth, Intara ya Mai-Ndombe.
Urubuga 7sur7.cd dukesha iyi nkuru ruvuga ko uruzinduko rwe muri kariya karere ruje mu gihe ingabo za Repubulika ya Demokarasi ya Congo zihanganye n’umutwe wa Mobondo mu Ntara ya Mai-Ndombe.
Bivugwa ko abarwanyi benshi bagize uyu mutwe witwara gisirikare bamaze kwicwa, barimo ba komanda babo, bamwe bafashwe, abandi baritanga.
Géneral Major Chico Tshitambwe, Umuyobozi Mukuru wungirije w’Igisirikare cya DR Congo (Chef d’Etat Major Géneral Adjoint Chargé des Operations), yari yarahawe kuyobora ibikorwa bya Gisirikare (Operations) mu Ntara ya Kivu y’Amajyaruguru aho M23 yari ihanganye bikomeye n’Ingabo za Leta, FARDC.
Gusa kubera gukekwaho ubugambanyi, Gen. Chico yahagaritswe kuri izi nshingano atageze ku mugambi we, mbere yo koherezwa gukorera ahandi.
