Ishyirahamwe ry’umupira w’amaguru ku isi, FIFA ryashyize Abanyarwanda batatu mu myanya ikomeye mu nzego zayo z’ubuyobozi, mu rwego rwo gukomeza guteza imbere ubunyamwuga, kurwanya ivangura no guteza imbere ikoranabuhanga mu mukino w’amaguru.
Perezida wa FERWAFA, Fabrice Shema yagizwe umunyamuryango w’akanama ka FIFA gashinzwe kurwanya ivangura n’irondaruhu (FIFA Anti-Racism and Anti-Discrimination Committee). Aka kanama gafite inshingano zo guharanira ko umupira w’amaguru ukinwa mu bwisanzure n’icyubahiro, nta vangura rishingiye ku ruhu, ubwoko, igitsina cyangwa inkomoko.
Mu bindi byemezo byafashwe na FIFA, Anne Lyse Kankindi uhagarariye ikipe ya AS Kigali FC, yagizwe umunyamuryango w’akanama ka FIFA gashinzwe ikoranabuhanga, udushya n’impinduka mu mupira w’amaguru (FIFA Committee on Football Technology, Innovation and Digital Transformation).
Aka kanama gafasha FIFA mu gutekereza no gushyira mu bikorwa udushya mu mukino w’amaguru, harimo ikoreshwa rya VAR, ikoranabuhanga mu isuzuma ry’imikinire n’imyitozo, ndetse n’ihinduramatwara ryerekeye uburyo amakipe akoresha amakuru y’ikoranabuhanga.
Ni na bwo kandi byemejwe ko Ambasaderi Martin Ngoga, umunyamategeko w’Umunyarwanda, akomeza kuyobora ishami rishinzwe iperereza mu kanama ka FIFA gashinzwe indangagaciro n’imyitwarire (Investigatory Chamber of the FIFA Ethics Committee).
Ngoga amaze imyaka akorana na FIFA muri uru rwego, aho yagiye agaragaza ubunyamwuga n’ubunyangamugayo mu bijyanye no gukurikirana no gukumira ibikorwa binyuranyije n’amategeko n’indangagaciro z’umupira w’amaguru ku isi.
Ibi byemezo ni ikimenyetso cy’uko u Rwanda rukomeje kugira ijwi rikomeye mu rwego mpuzamahanga rw’umupira w’amaguru, ndetse bigaragaza icyizere FIFA ikomeje kugirira Abanyarwanda mu guteza imbere uyu mukino ku isi yose.
