Perezida wa Tanzania, Dr John Pombe Magufuli, yatangaje ko ateganya kohereza muri Madagascar indege yo kwikorera umuti wa Covid-Organics Perezida Andry Rajoelina yemeje ko uvura icyorezo cya Covid-19.
Perezida Magufuli yabitangaje kuri iki cyumweru tariki ya 03 Mata, ubwo yari ayoboye umuhango w’irahira rya Dr Mwigulu Nchemba uheruka kugirwa Minisitiri ushinzwe itegeko nshinga n’andi mategeko. Dr Nchemba uyu yasimbuye Dr Augustine Mahiga wapfuye ku wa gatanu w’iki cyumweru.
Perezida Magufuli yavuze ko yamaze gusaba Madagascar kuri Covid-Organics, nyuma y’uko iki gihugu kimwandikiye ibaruwa imumenyesha ko cyamaze kubona umuti uvura icyorezo cya Covid-19.
Yagize ati”Ndi kuvugana na Madagascar kandi bamaze kwandika ibaruwa. Bavuga ko hari imiti ihari, tuzoherezayo indege kandi iyo miti izazanwa kugira ngo Abanya Tanzania bayungukireho … Turi muri guverinoma ikora amanywa n’ijoro.”
Muri Tanzania habarurwa ababarirwa muri 480 banduye Covid-19, mu gihe abishwe na yo batangajwe mu ntangiriro z’iki cyumweru ari 16.
Umuti wa Covid-Organics, ukozwe mu byatsi byitwa Artemisia – umuti byemejwe ko ukoreshwa mu kuvura Malaria. Ni umuti kandi ukozwe no mu bindi byatsi gakondo byo muri Madagascar nk’uko ikigo cya Madagascar gikora ubushakashatsi (IMRA) cyabitangaje.
Tanzania yiyongereye ku bindi bihugu bya Afurika byamaze kuwusaba, birimo Sénégal, Guinée Bissau, Guinée Équatoriale n’ibirwa bya Comores byawusabye uyu munsi, nk’uko byemejwe na Perezida Rajoelina.
Cyakora cyo n’ubwo ibihugu bya Afurika bikomeje kwiyambaza uyu muti wa Madagascar, Ishami ry’umuryango w’abibumbye ryita ku buzima (OMS) ryashidikanyije ku buziranenge bwawo rivuga ko nta kimenyetso cyerekana ko uvura, bijyanye n’uko nta bihamya byawo bishingiye kuri siyansi byigeze bigaragazwa.
