Perezida wa Tanzania, John Pombe Magufuli ntashira amakenga ibyuma byo muri laboratwari y’igihugu bipima abanduye indwara y’icyorezo ya Covid-19 mu gihe bakoze igenzura bagasanga n’ipapayi yaranduye, bitandukanye n’ubushakashatsi bwakozwe ndetse bukemezwa n’inzego zirimo Umuryango Mpuzamahanga wita ku buzima, WHO.
Mu gihe gito, iki gihugu cyavuzwemo umubare munini w’abanduye Covid-19 aho ubu kimaze kugaragaramo 480 ndetse n’abapfuye 16. Ibi byatumye abayobozi b’iki gihugu bashinjwa kujenjekera iki cyorezo nk’impamvu nyamukuru y’ubwiyongere bukabije.
Perezida Magufuli yasabye inzego zishinzwe iterambere n’amahoro ndetse na Depite Mchembe ko bagenzura imikorere y’ibi byuma. Ati: “Laboratwari y’Igihugu ipima Corona hari ibintu bihabanye bitangaje ikora. Tubona inshuro kenshi bagaragaza za ‘positive. » Akomeza avuga ko bakoze ubushakashatsi bwabo kugira ngo bamenye ukuri.
Bifashishije amavuta y’imodoka bahaye izina rya Jabil Hamza n’imyaka 30 y’amavuko, bamaze kuyapima muri ibi ibyuma basanga nta Corona afite. Bapimye amazi y’ifenesi, ntibabona ibyavuyemo. Bapimye amazi y’ipapayi bahaye izina rya Elizabeth Anne n’imyaka y’amavuko 56, Magufuli ati: “Basanga ifite ‘positive’ bivuze ko amazi yavuye mu ipapayi arimo Corona.”
Bageragereje ku zindi nyamaswa nk’inkware basanga nta Covid-19, bageragereza ku ntama basanga nta Covid-19, bapimye intamba basanga ifite iki cyorezo.
Perezida Magufuli yatangaje ko kubera iyo mpamvu, ibikorwa bigomba gukomeza mu gihugu, nta bwoba bw’iki cyorezo. Abaturage barasabwa gukora ibikorwa bibinjiriza ndetse n’igihugu muri rusange, muri iki gihe ibindi bihugu byafunzwe mu rwego rwo gukumira Covid-19.
Ubushakashatsi bwakozwe bugaragaza ko indwara ya Covid-19 ishobora gufata umuntu ndetse n’inyamaswa, ibi biremwa byombi bikaba byakwanduzanya. Byaba ari ibintu bidasanzwe ikimera nk’ipapayi kibonetsemo iki cyorezo, mu gihe koko isuzuma ryo muri Tanzania ryaba ryarakozwe neza.
