Amakuru yamenyekanye ejo kuwa 18 Gicuransi 2020 avuga ko Visi Perezida wa Sudani y’Epfo Riek Machar n’umugore we Angelina Teny ibipimo byagaragaje ko bamaze kwandura virusi ya covid-19.
Riek Machar ibi yabitangaje kuwa Mbere yemeza ko we n’umugore we na we uri muri Minisiteri y’Umutekano bombi basanganywe coronavirus bakaba barayandujwe n’abakozi b’urwego rukuru rushinzwe guhashya icyorezo cya coronavirus muri iki gihugu akaba ari na we uyuboye uru rwego.
Itangazo ryaturutse mu biro bya Visi Perezida Machar rivuga ko uretse we n’umugore we, abandi bakozi bo mu biro bye ndetse n’abashinzwe umutekano na bo banduye iyi virusi uretse ko bo batatangajwe amazina ako kanya.
Mu nama yagiranye n’abanyamakuru mu mujyi wa Juba hifashishijwe uburyo bw’amashusho yavuze ko gupima bikomeje kandi abasanganywe virusi bameze neza. Machar yagize ati “Turacyategereje ko hafatwa ibindi bipimo kandi turizera ko ejo tuzaba twamaze kumenya umubare wa nyawo w’abanduye. Abavandimwe bacu basanganywe virusi bose bameze neza.”
Machar yagiye muri Guverinoma ya Sudani y’Epfo nyuma y’ubwumvikane bw’amahoro ishyaka rye People’s Liberation Movement riravuga rumwe na Leta ryasinyanye na yo amasezerano muri Nzeri 2018.
