Urukiko rw’Ibanze rwa Muhoza mu Karere ka Musanze , mu gitondo cyo kuri uyu wa Kane tariki 28 Gicuransi 2020, rutegetse ko uwari Gitifu w’Umurenge wa Cyuve, uw’akagari ka Kabeza na ba Dasso babiri bo muri uwo murenge baregwa icyaha cyo gukubita no gukomeretsa ku bushake bafungwa iminsi 30.
Iki cyaha cyagizwemo uruhare n’Umunyamabanga nshingwabikorwa w’Umurenge wa Cyuve Sebashotsi Gasasira Jean Paul, Umunyamabanga nshingwabikorwa w’Akagari ka Kabeza Tuyisabimana Jean Leonard, n’aba Dasso babiri ari bo Nsabimana Anaclet na Abiyingoma Sylvain, bakekwaho gukubita Nyirangaruye Uwineza Clarisse na musaza we Manishimwe Jean Baptiste bo mu Kagari ka Kabeza ho mu murenge wa Cyuve.
Mu rubanza rwo kuwa 27 Gicurasi 2020 abaregwa basabaga kurekurwa bakaburana badafunze byaba ngombwa bakanatanga ingwate mu kwizeza urukiko ko badashobora gutoroka ngo kuko icyaha baregwa kitakozwe babigambiriye ahubwo ibyabaye kwari ukwitabara. Bimwe mu byo bagaragarije urukiko basabaga ko byashingirwaho barekurwa ni uko muri izo mvururu bagaragayemo ku itariki 13 Gicurasi 2020, bemeza ko batakubise abaturage ku bushake, ahubwo ko bwari uburyo bwo kwitabara nyuma y’uko abo baturage baje babarwanya.
Hifashishijwe amashusho yafashwe hanashingiwe ku buhamya bw’abaturage, Urukiko rwagaragarije ababurana ko ubwiregure bwabo nta shingiro bufite ndetse ruvuga ko hagendewe kuri raporo ya muganga yerekanye ko Nyirangaruye yagize ububabare bwa 80% bityo urukiko rugasanga ari impamvu ikomeye ituma batarekurwa ngo baburane bari hanze, rutegeka ko bafungwa iminsi 30.
Urwego rw’Igihugu rw’Ubugenzacyaha, RIB, rwataye muri yombi aba bayobozi kuwa 14 Gicuransi 2020, nyuma y’imvururu bagaragayemo bakubita Nyirangaruye Uwineza Clarisse na musaza we witwa Manishimwe Jean Baptiste.
