Ku munsi nk’uyu ni bwo Aleksei yagabye igitero ku Budage cyafashwe nk’igikomeye mu ntambara y’Isi ya mbere, by’umwihariko kuri Austria-Hangary yari igize uruhande rwa Central Powers.
Mu ntambara y’Isi ya mbere impande zari zihanganye rwari urwitwa Triple Entente rwari rurimo ubwami bw’u Burusiya, u Bufaransa n’u Bwongereza, ndetse na Central Powers rwari rugizwe n’U Budage, Austria-Hungary, ubwami bwa Ottoman na Bulgaria.
Mu 1915, u Burusiya bwari bwaratsinzwe urugamba rwa Poland rwabereye mu gace ka Tarnow, gusa Aleksei yavugaga ko aho byapfiriye ahazi noneho atatsindwa iyi ntambara.
Uyu mugabo yavugaga ko ingabo ze ziteguye neza kuko zamaze kuruhuka bihagije, ndetse n’abajenerari bari barimo, bavugaga ko bagiye gutungura abadage bakabaha isomo kubera imyitozo bafite.
Nubwo u Burusiya bwagabye igitero bushaka guhangana n’Abadage, byarangiye Austria ari yo yitambitse maze Abarusiya bayiha isomo karava, ingabo bazambura intwaro zose.
Uwari umwami wa Austria-Hungary yatangiye gusabwa kwaka ubufasha u Budage kubera ko we byari byamuyobeye.
U Budage rero bwahise butegura ingabo ngo zige guhagarika Abarusiya kuko bari bakamejeje.
Uru rugamba rwatangiye ku munsi nk’uyu ntirwari rworoshye kuko Abarusiya bari hagati ya 500,000 na 1,000,000 barakomeretse harimo n’abapfuye n’abafashwe, mu gihe ku ruhande rwa Central Powers ho Austria yonyine abari hagati ya 1,000,000 na 1,500,000 bakomeretse harimo n’abapfuye n’abagizwe imbohe, ndetse Abadage 350,000 barahamugariye, mu gihe ubwami bwa Ottoman bwo abasirikare babwo 12,000 bakomeretse bikomeye.
