Irushanwa rya ‘Huye Half Marathon’ rigomba kubera mu karere ka Huye ku nshuro yarwo ya gatatu, rirabura amasaha abarirwa ku ntoki mbere yo gutangira ku Cyumweru tariki ya 30 Ugushyingo 2025.
Iri rushanwa ryo gusiganwa ku maguru, risanzwe ritegurwa na Cercle Sportif de Butare ifatanyije n’Akarere ka Huye riberamo, cyo kimwe n’abafatanyabikorwa barimo Minisiteri ya Siporo, Komite Olempike y’u Rwanda ndetse n’ishyirahamwe ryo gusiganwa ku maguru mu Rwanda (RAF).
Mu byiciro bizitabira iri siganwa harimo abasanzwe basiganwa babigize umwuga bazasiganwa mu ntera ingana n’ibilometero 21, icyiciro cy’abatarabigize umwuga bazasiganwa intera y’ibilometero 8 mu gihe icyiciro cya gatatu kizasiganwamo abakuze n’abakiri bato bazasiganwa mu ntera ingana n’ibilometero bitanu ku bakuze na bitatu ku bana.
Abazasiganwa ku magare bo bazirukanka ibilometero 29.
Abazitabira Huye Half Marathon 2025 bazakoresha imihanda yo mu mujyi ku nzu mberanyombi, banyure kuri Galileo Hotel bakomereze Petit Seminaire Virgo Fidelis.
Bazaca kandi kuri Controle Technique berekeze Ecole Primaire de Ngoma, bakomereze mu muhanda wa kaburimbo ugera mu Rwabayanga, bakomereze ku bitaro bya CHUB, bace kuri Hotel Barthos, bakomereze kuri Casa Hotel, bongere banyure ku mberabyombi mbere yo gusoreza kuri Stade Mpuzamahanga ya Huye.
Umuyobozi w’Akarere ka Huye, Ange sebutege, avuga ko muri ririya rushanwa ibyiciro byose byatekerejweho, ndetse ko buri cyiciro hazavamo abagenerwa ibihembo.
Yagize ati: “Isiganwa ritegurwa kugira ngo habeho no guhiganwa ibyiciro byose bizasiganwa. Hazahembwa batatu ba mbere muri buri cyiciro, kandi mu byiciro byombi: Abahungu n’abakobwa.”
Yunzemo ko undi mwihariko ari uko abazaba bitwaye neza Mu karere bazahembwa mu rwego rwo kubashimira no gutuma baakomeza kwitabira siporo.
Mu cyiciro cy’ababigize umwuga (mu gusiganwa ku maguru) uwa mbere mu bahungu no mu bakobwa azahembwa Frw 400,000, mu gihe mu bindi byiciro byose bazahembwa Frw 100,000.
Hazahembwa kandi umuntu ukuze uzitabira irushanwa akabasha no kurirangiza.
Abazasiganwa ku magare uwa mbere azahabwa igihembo cya Frw 200,000, uwa kabiri ahabwe Frw 150,000 mu byiciro byombi.
Meya Sebutege avuga ko “abikorera na bo batangiye kwitegura, twabasabye gutanga serivise nziza zihuse kandi zinoze.”
Yunzemo ati: “Ariko mu rwego rwo kumenyekanisha amateka y’igihugu n’ibyiza bitatse u Rwanda, hazerekanwa na filime mbarankuru mu ma shuri atandukanye na Kaminuza y’u Rwanda.”
Umwihariko w’uyu mwaka
Mu byihariye bizagaragara muri Huye Half Marathon y’uyu mwaka, harimo amagare ya “Pneu ballon” azagaragara mu siganwa n’isiganwa ry’abafite ubumuga.
Umuyobozi wakarere avugako umwaka utaha bifuza gutegura icyo bise ‘weekend sportif’ izahuza imikino itandukanye izabera igihe kimwe, irimo Huye Rally, Volleyball, Basketball n’indi.
Ni gahunda ahamya ko izarushaho gutuma umujyi ushyuha, bityo bigatuma urubyiruko rusabana kandi tukarushaho kugira ubuzima bwiza.
