Ikipe ya Al Hilal SC yatangaje ko itemeranya n’ibyemezo yafatiwe n’Ishyirahamwe ry’Umupira w’Amaguru muri Afurika (CAF), nyuma y’imvururu zavutse ku mukino watsinzwemo MC Alger ibitego 2–1 wakinirwa kuri Stade Amahoro.
Mu ijoro ryo ku wa 27 Ugushyingo 2025, Al Hilal yakiriye ibaruwa ivuye mu kanama ka CAF gashinzwe imyitwarire, ibamenyesha ko umukinnyi wabo ukomeye Jean Claude Girumugisha, ukomoka mu Burundi, ahagaritswe imikino itatu akanacibwa amande ya $5,000.
Ikipe ubwayo kandi yahanwe $15,000 kubera imvururu zabaye nyuma y’uwo mukino wari uwo gufungura amatsinda ya CAF Champions League.
Girumugisha yari umwe mu bakinnyi bihagazeho kuri uwo mukino, ndetse yitwaye neza. Ariko Al Hilal ivuga ko ibyo aregwa bidahuye n’ibyabaye koko mu kibuga. Bavuga ko raporo ya Komiseri w’Umukino n’uwacungaga umutekano igaragaza ko Girumugisha ari we wacungwaga n’abatoza n’abakinnyi ba MC Alger bari bagerageza kumukubita.
Iyi kipe ivuga ko yafatiwe ibihano itunguwe kandi ibona ko habaye akarengane, bityo ihita ifata icyemezo cyo kujurira kuri CAF.
Al Hilal ifite imikino ikomeye iri imbere muri CAF Champions League, irimo guhura na Saint Eloi Lupopo ku Cyumweru tariki 30 Ugushyingo 2025, n’iya Mamelodi Sundowns mu ntangiriro z’umwaka wa 2026.
Kuri ubu, Al Hilal SC Omdurman iri gukorera ibikorwa byayo i Kigali, ari naho ikinira shampiyona n’imikino yayo yo mu matsinda ya CAF Champions League.
