Umugabo wo mu karere ka Murang’a witwa Pasiteri Jimmy (James) Irungu, w’imyaka 30, yaguye igihumure nyuma yo kumara amasaha 79 n’iminota 40 ahobeye igiti, mu gikorwa yari agamije kurenza agahigo ka mbere k’amasaha 72 kari karashyizweho n’umugore witwa Truphena Muthoni.
Ibi byabaye ubwo Irungu yari hafi kurangiza iki gikorwa cy’amasaha 80, aho abaturage bari bateraniye aho yari ari bihutiye kumufasha, ahita ajyanwa ku bitaro bya Murang’a County Level Five Hospital. Inzego z’ibanze zemeje ko ameze neza kandi ari atekanye, icyabaye kikaba cyatewe n’umunaniro ukabije.
Ushinzwe urubyiruko mu Ntara ya Murang’a, Manoah Gachucha, yavuze ko ibipimo by’ubuzima bwe byerekanye ko nta kibazo gikomeye afite, kandi ko abaganga bemeje ko ashobora gusohoka mu bitaro mu masaha make.
Iki gikorwa cyakurikiwe cyane n’Abanya-Kenya benshi, haba aho cyabereye no ku mbuga nkoranyambaga, aho amakuru y’amasaha agenda yiyongera yasakazwaga hose. Abantu benshi bari bateraniye aho cyabereye, baririmba banabyina ubwo Irungu yarenzaga amasaha 72, bakabifata nk’intsinzi ikomeye.
Irungu yatangiye iki gikorwa ku Cyumweru, ateganya kugisoza ku wa Kane saa 5:27 za mu gitondo, agamije gukangurira abantu kwita ku ndwara ya kanseri, no gusaba Leta n’abafatanyabikorwa kugabanya ikiguzi cyo kuyivuza no kongera uburyo bwo kuyisuzuma mu baturage bo hasi.
Abayobozi batandukanye, abahanzi n’ibyamamare ku mbuga nkoranyambaga, barimo na Truphena Muthoni, baje kumushyigikira. Guverineri wa Murang’a, Irungu Kang’ata, yatangaje ko abaganga bari maso kugira ngo bakurikirane ubuzima bwe, anavuga ko nyuma yo gukira bazaganira ku buryo ibitekerezo bye byafasha mu kurwanya kanseri.
Umuvandimwe we, John Irungu, yavuze ko atari yarafashe iki gikorwa nk’icyoroshye, ariko ko yaje kumenya uburemere bwacyo amaze kubona uko umuvandimwe we yakomeje kwihangana.
Irungu yavuze ko yahisemo iki gikorwa nyuma yo kubona abakristo benshi n’imiryango myinshi bahangayikishijwe na kanseri, ayita “icyorezo gituje gikomeje gutwara ubuzima bwa benshi.”
