Intumwa za Minisiteri y’ingabo y’u Rwanda ziyobowe na Brig. General Stanislas Gashugi, Umuyobozi w’Ingabo Zidasanzwe za RDF (SOF), zitabiriye imurikagurisha n’inama ku bijyanye n’ubwirinzi bwo mu mazi (Doha International Maritime Defence Exhibition and Conference) muri Qatar.
Imurikagurisha rya DIMDEX Qatar 2026 ryateguwe ku nkunga ya Sheikh Tamim bin Hamad Al-Thani, Emir wa Qatar kandi ryakirwa n’Igisirikare cya Qatar, ryagaragaje udushya mu bya gisirikare ndetse n’ibisubizo by’umutekano by’ahazaza.
Amafoto yagiye ahagaragara agaragaza Brig. Gen. Gashugi n’intumwa za Minisiteri y’ingabo bari bari kumwe, berekwa igishushanyo cy’ubwato bugezweho bw’intambara.
Igisirikare cy’u Rwanda (RDF) gisanzwe gifite umutwe w’ingabo zirwanira mu mazi wibanda ku mutekano wo ku mipaka, kurwanya iterabwoba, no kurwanya magendu ku Kiyaga cya Kivu. Uyu mutwe bivugwa ko watewe inkunga y’amahugurwa n’ibikoresho na Minisiteri y’Ingabo ya Amerika (harimo ubwato na moteri), urinda umutekano n’ituze ku mipaka y’amazi na Repubulika ya Demokarasi ya Congo.
Imurikagurisha rya DIMDEX ryabaga ku nshuro ya cyenda, ryabaye kuva ku itariki ya 19 kugeza ku ya 22 Mutarama 2026 ribera muri Qatar National Convention Centre, ku nsanganyamatsiko igira iti: “Global Hub for Defence Innovations: Invest in Possibilities to Shape a Secure Tomorrow”.
