Ishyirahamwe ry’umupira w’amaguru muri Maroc (FRMF) ryatangaje ko rigiye kujuririra ibihano n’amande ryaciwe n’Ishyirahamwe ry’umupira w’amaguru muri Afurika (CAF), nyuma y’akavuyo kabaye ku mukino wa nyuma w’Igikombe cya Afurika wahuje Maroc na Sénégal mu kwezi gushize.
CAF yaciye Maroc amande angana na $315,000 inahanisha abakinnyi babiri guhagarikwa imikino. FRMF yavuze ko izajurira igamije “kurengera uburenganzira bwayo,” ivuga ko ibihano bidahura n’uburemere bw’ibyabaye.
Umukino wa nyuma wabaye ku wa 18 Mutarama waranzwe n’impaka nyinshi, nyuma y’igitego cya Ismaila Sarr cyanzwe ndetse Maroc igahabwa penaliti yateje imyigaragambyo ku bakinnyi ba Sénégal. Iyo penaliti yatewe na Brahim Diaz ntiyabyaye umusaruro kuko umunyezamu Edouard Mendy yayikuyemo. Nyuma, Sénégal yatsinze igitego cyabahesheje kwegukana igikombe cya kabiri cya AFCON.
CAF yaciye Maroc amande arimo $200,000 kubera imyitwarire idakwiye y’abasore batoragura imipira, $100,000 kubera imyitwarire y’abakinnyi n’abatoza binjiye ahasuzumirwa amashusho ya VAR, ndetse na $15,000 kubera abafana bakoresheje laser bashaka kurangaza abakinnyi ba Sénégal.
Byongeye kandi, rutahizamu Ismael Saibari yahagaritswe imikino itatu anacibwa $100,000, mu gihe kapiteni Achraf Hakimi yahagaritswe imikino ibiri.
Na Sénégal yaciwe amande angana na $615,000 ndetse umutoza wayo Pape Thiaw ahagarikwa imikino itanu. Iryo shyirahamwe na ryo ryatangaje ko rigiye kujuririra ibi bihano.
