Abadepite 4 mu nteko ishingamategeko ya Uganda, barimo 2 b’ishyaka NRM riri ku butegetsi biyemeje gushyigikira Bobi Wine mu matora yo muri Mutarama umwaka utaha.
Patrick Nsamba uhagarariye akarere ka Kassanda na John Baptist Nambese uhagarariye Majinja ni bamwe mu badepite bahagarariye ishyaka rya National Resistance Movement(NRM) rya Perezida Museveni mu nteko ishinga Amategeko batangaje ko bagiye gushyigikira Robert Kyagulanyi mu matora ateganyijwe mu mwaka w’2021.
Mu bandi bemeje ko bazashyigikira Bobi Wine, mu matora ataha ni Francis Zaake na David Karwanga binjiye mu nteko ishingamategeko ya Uganda nk’abakandida bigenga.
Mu ijambo yagejeje ku barwanashyaka ba National Unity Platform, Robert Kyagulanyi yashimiye izo ntumwa za rubanda ziyemeje kumushyigikira, anakangurira abayoboke be kutabashidikanyaho kabone nubwo harimo abavuye mu ishyaka rya Perezida Museveni bazaba bahanganye mu matora.
Yagize ati: ”Nk’uko nabigarutseho nkoresheje imbuga nkoranyambaga zanjye, nongeye kubasaba kwizera aba bayoboke bashya tubonye”
Patrick Nsamba wavuze ahagarariye abo badepite ,yavuze ko n’ubwo yahoze muri NRM atigeze yishimira politiki yayo muri iki gihe, bityo ikaba ari yo mpamvu yamuteye kwiyunga n’ishyaka NUP kugirango nawe agire uruhare mu miyoborere myiza n’impinduka igihugu gikeneye.
Mu ntangiriro z’uyu mwaka ni bwo Bobi Wine yakomeje kugaragaza ko afite inyota yo kwiyamamariza kuyobora Uganda, kuri ubu akaba yaramaze kwemeza ko aziyamamaza. Mu matora ataha azaba ahateye n’umukandika ukomeye w’ishyaka NRM,Yoweri Museveni umaze imyaka isaga 34 ayobora iki gihugu.
Amatora y’Umukuru w’Igihugu aho muri Uganda ateganyijwe muri Mutarama umwaka utaha 2021.
