Mu gitondo cyo kuri iki Cyumweru tariki ya 9 Kanama 2020, inkongi y’umuriro yibasiye ikigo kivurirwamo abarwayi barwaye icyorezo cya Coronavirus mu gihugu cy’u Buhinde, 10 bahita bapfa naho abarenga 20 barakomereka.
Iyi nkongi y’umuriro yibasiye Hoteli yitwa Swarna Palace iri kwifashishwa muri iyi minsi mu kwita ku barwayi ba Coronavirus, iherereye mu Mujyi wa Vijaywada, mu majyepfo ashyira uburasirazuba bw’Ubuhinde.
Igipolisi cyo muri iki gihugu cyatangaje ko abarwayi 10 ba Covid-19 bavurirwaga muri iki kigo ari bo bamaze kwicwa n’inkongi, mu gihe abandi barenga 20 bakometerse bakaba bahise bajyanwa kuvurirwa mu bindi bitaro. Polisi yavuze ko bikekwa ko iyi nkongi yaba yatewe no guhura kw’insinga z’amashanyarazi n’ubwo iperereza rigikomeje, ubu itsinda rishinzwe ubutabazi bwo kuzimya inkongi rikaba ryahise ryihutira kuwuzimya rigakuramo n’abari barimo.
Minisitiri w’Intebe w’u Buhinde, Narendra Modi ku rukuta rwe rwa Twitter yavuze ko atewe agahinda n’uyu muriro wibasiye ikigo cy’abarwayi ba Covid-19, yihanganisha n’imiryango yaburiye ababo muri iyi mpanuka.
Ni mu gihe Umuyobozi wa Leta ya Andhra Paradesh (imwe mu zigize u Buhinde), Jagan Mohan Reddy we yatangaje ko leta iraha imiryango y’ababuriye ababo muri iyi mpanuka miliyoni eshanu z’Amarupe kuri buri muryango (agera ku 66,650 y’Amadolari y’Amerika) nk’uko Reuters yabitangaje.
Iyi nkongi yibasiye ahavurirwa abarwayi ba Covid-19 ibaye iya kabiri mu Buhinde kuko no mu cyumweru gishize abarwayi 8 bapfiriye mu mpanuka y’inkongi y’umuriro yibasiye ibitaro byigenga biherereye mu Mujyi wa Ahmedabad mu burengerazuba bw’iki gihugu.
