Mu ijoro ry’uyu wa 9 Kanama 2020, abantu 9 bafatiwe mu rugo rwa Miss Vivine Uwizeye wigeze kwandura icyorezo cya Covid-19, mu Mudugudu wa Ihuriro, Akagari ka Gatenga, Umurenge wa Gatenga ho mu Karere ka Kicukiro barugize akabari.
Umunyamabanga Nshingwabikorwa w’Umurenge wa Gatenga, Mugisha Emmanuel yahamirije bwiza.com aya makuru, gusa avuga ko Miss Viviane we atafashwe kuko arwaye.
Gitifu Mugisha ati: “Ntabwo [Vivine] yafashwe, ahubwo hafashwe abari barimo, we ngo ararwaye.” Avuga ko kandi aba bantu uko ari icyenda bari kwa Vivine bahanyweraga n’inzoga.
Aba bose bafashwe bajyanwe kurazwa muri Sitade ya IPRC Kigali, ahahoze hitwa Eto Kicukiro, iki kikaba ari kimwe mu bihano bihabwa umuntu wese utibahirije amabwiriza yo kwirinda Covid-19.
Mu mpera za Mata 2020 ni bwo byatangajwe ko Miss Vivine yanduye Covid-19, icyo gihe mu Gatenga ahegereye mu rugo iwe harindiwe umutekano mu buryo buhambaye kugira ngo hatagira undi iki cyorezo gifata. Yabonetse mu bakize iki cyorezo tariki ya 13 Gicurasi 2020, abaganga baramusezerera.
Miss Vivine yerekanaga icyemezo kigaragaza ko yakize Covid-19
