Urwego rushinzwe abinjira n’abasohoka mu Rwanda rwatangaje ko abantu bari baraguze pasiporo z’u Rwanda mbere ya tariki 27 Kamena 2019 basabwa kongera gushaka izindi kuko zigiye guteshwa agaciro zigasimbuzwa Pasiporo z’Afurika y’Iburasirazuba.
Itangazo Urwego rushinzwe abinjira n’abasohoka (Immigration and Emmigration) rwasohoye kuri uyu wa Kane tariki 13 Kanama 2020, rivuga ko pasiporo zatanzwe mbere y’itariki yavuzwe hejuru zitazongera gukoreshwa guhera tariki 28 Kamena 2021.
Tariki 28 Kamena 2019 ni bwo hatangiye gukoreshwa pasiporo Nyarwanda y’Afurika y’Iburasirazuba ikoranye ikoranabuhanga, ikaba ari nayo igomba gusimbura iz’u Rwanda zari zisanzwe. Urwego rushinzwe abinjira n’abasohoka rwatangaje ko iyi pasiporo ikoranye ikoranabuhanga irimo gutangwa ku bayifuza banyuze ku rubuga Irembo.
