Ikipe y’umupira w’amaguru ya Repubulika ya Demukarasi ya Congo yitabiriye irushanwa rya CHAN 2020, ikomeje kugaragaramo abakinnyi bandura icyorezo cya Covid-19, aho ubu isigaranye umuzamu umwe muri batatu yaserukanye.
Aya makuru yamejwe kuri uyu wa 24 Mutarama 2021, avuga ko abarimo umuzamu Nathan Mabruki Tshumu, Rick Tulenge na William Likuta banduye iki cyorezo; igiteranyo cy’abamaze kwandura muri iyi kipe kikaba cyageze kuri 12, hiyongereyemo umutoza mukuru, Florent Ibenge.
Umuzamu iyi kipe isigaranye ni Siadi Ngusia Baggio uri ku mwanya wa gatatu mu bazamu, hanyuma ya Ley Matampi uherutse kugaragaraho iki cyorezo tariki ya 20 Mutarama, na Mabruki.
Abakinnyi batanu: Djo Issama Mpeko, Mercey Ngimbi, Merveille Kikasa, Atibu Radjabu na Philippe Kinzumbi ni bo babonetseho iki cyorezo bwa mbere tariki ya 17 Mutarama. Gusa bo bamaze gukira.
Abandi bakinnyi bane barimo: Matampi, Serge Mukumi Mulamba, Andy Bikoko na Doxa Gikanji babonetseho iki cyorezo tariki ya 20 Mutarama, ntibakina umukino na Libya.
N’ubwo iyi kipe ikomeje kunyura mu bihe bitayoroheye ku bijyanye n’ubuzima bw’abakinnyi, ntibyayibujije kwitwara neza kuko ni yo iyoboye urutonde B irimo, n’amanota 4 ikesha intsinzi ku mukino wa mbere ndetse no kunganya na Libya. Kuri uyu wa 25 Mutarama irakina umukino wa nyuma mu matsinda n’ikipe y’igihugu ya Niger iyikurikiye ku rutonde n’amanota 2.
