Perezida Yoweri Kaguta Museveni wa Uganda na Madamu we, Janet Kataha Museveni, batangaje ko bahawe urukingo rwa mbere rw’icyorezo cya COVID-19.
Perezida Museveni na Madamu we bakingiriwe mu gace ka Nakasero nk’uko yabyemeje kuri Twitter.
Ati: “Madamu wanjye Janet Museveni nanjye twafatiye urukingo rwacu rwa COVID-19 muri Nakasero. Ndashishikariza abanya-Uganda bose bemerewe gufata uru rukingo kugana ibigo nderabuzima bakaruhabwa.”
Perezida Museveni yibukije Abagande gukomeza kubahiriza amabwiriza yo kwirinda icyorezo cya COVID-19, arimo kwambara agapfukamunwa, gukaraba intoki no guhana intera.
Perezida Museveni yakiriye urukingo rwa COVID-19 nyuma y’umunsi umwe abarimo Minisitiri w’Intebe, Dr Ruhakana Rugunda bahawe ruriya rukingo.
Lt Gen Muhoozi Kainerugaba, Umujyanama wa Perezida Museveni, umuhungu we akanaba umuyobozi w’Ingabo zidasanzwe zishinzwe kumurinda na we yakiriye uru rukingo mu minsi yashize.
Kurikira ibiganiro n’amavidewo binyura kuri Bwiza TV
