Perezida wa Repubulika ya Sudani y’Epfo, Salva Kiir amaze kugera muri Uganda, aho yagiye kwitabira umuhango w’irahira rya mugenzi we, Yoweri Kaguta Museveni, uteganyijwe kuri uyu wa 12 Gicurasi 2021.
Amashusho yatambutse mu buryo bw’aka kanya (live) kuri televiziyo ya UBC yo muri Uganda, agaragaza Perezida Kiir yururuka mu ndege y’ikigo cy’u Rwanda gishinzwe ubwikorezi bwo mu kirere, RwandAir, ku kibuga cy’indege mpuzamahanga cya Entebbe giherereye muri Kampala.
Perezida Kiir ari mu bakuru b’ibihugu batatu bamaze kugera muri Uganda mu rwego rwo kwitabira iki gikorwa. Abandi ni: Perezida Evariste Ndayishimiye w’u Burundi na Mohamed Abdullahi Farmaajo wa Somalia.
Byitezwe kandi ko i Kampala hagera abandi bakuru b’ibihugu bane barimo: Perezida wa Afurika y’Epfo, Perezida wa Ghana, Perezida wa Guinea na Perezida wa Zimbabwe.
Perezida Museveni agiye kurahira nyuma y’amezi hafi ane ashize atsinze amatora y’Umukuru w’Igihugu yabaye tariki ya 14 Mutarama 2021.
Amafoto: Guverinoma ya Uganda/Twitter
Kurikira ibiganiro n’amavidewo binyura kuri Bwiza TV
