Ikipe ya Mukura victory sports et Loisirs, nyuma yo kwirukana umutoza wayo mukuru Rodolfo Zapata yabashije kubona amanota atatu ya mbere muri shampiyona, nyuma yo gutsinda Etincelles FC igitego 1-0.
Hari mu mukino wo guhatanira kuguma mu kiciro cya mbere iyi kipe yari yakiriyemo Etincelles kuri Stade Mpuzamahanga ya Huye.
Ni umukino watangiye amakipe yombi yatakana cyane, intego ari ugushaka ibitego hakiri kare.
Mukura VS byagaragaraga ko inyotewe no kubona intsinzi ya mbere muri shampiyona, yarangije iminota 45 y’igice cya mbere cy’umukino inganya na Etincelles 0-0.
Igitutu ikipe ya Mukura yatangiye igice cya kabiri ishyira kuri Etincelles, cyatumye myugariro wa Etincelles yitsinda igitego ku munota wa 68, ku mupira wari uhinduwe n’Umunya-Ghana Opuku Mensah.
Kuva shampiyona ya 2020/21 yatangira igikomeye Mukura VS yari yarakoze ni ukunganya no gutsindwa.
Iyi kipe iracyakeneye kubyaza umusaruro imikino ine ya shampiyona isigaye mu rwego rwo kwirinda kumanuka mu kiciro cya kabiri.
Kurikira ibiganiro n’amavidewo binyura kuri Bwiza TV
