Umugabo wo mu Karere ka Rutsiro wishe umugore we mu kwezi gushize agahita aburirwa irengero yaje gutabwa muri yombi n’inzego z’umutekano zihita zimushyikiriza ubushinjacayaha.
Kuri uyu wa Kane, itariki 05 Kanama 2021, nibwo Ubushinjacya ku rwego Rwisumbuye rwa Nyagatare bwakiriye dosiye y’umugabo ukomoka mu Karere ka Rutsiro, Umurenge wa Rusebeya wishe umugore we bashakanye agahita atoroka.
Icyaha cy’ubwicanyi akurikiranweho cyakozwe ku itariki ya 11 Kamena 2021 mu Mudugudu wa Rebero, Akagari ka Gashenyi, Umurenge wa Rukomo, Akarere ka Nyagatare nk’uko iyi nkuru dukesha Ubushinjacyaha Bukuru ivuga.
Uregwa yasanze umugore we kwa nyina wabo aho yari yaramuhungiye kubera kurambirwa guhora batongana banarwana, amusanga mu gikoni arikuvugira kuri terefoni , amutema ijosi akoresheje umuhoro arapfa. Uregwa yahise atorokera mu Karere ka Gatsibo, aza gufatirwa mu Murenge wa Rusoro.
Naramuka ahamwe n’icyaha, uregwa azahanishwa igihano cy’igifungo cya burundu hashingiwe ku ngingo ya 107 y’itegeko no 68/2018 ryo ku wa 30/08/2018 riteganya ibyaha n’ibihano muri rusange.
Kurikira ibiganiro n’amavidewo binyura kuri Bwiza TV
