Polisi ya Uganda yahaye ipeti ryisumbuye Peruth Chemutai uherutse kwegukana umudari wa zahabu mu kwiruka, mu mikino ya Olempike 2020 iri kubera mu Buyapani.
Chemutai uhagarariye Uganda mu mukino wo kwiruka yabaye uwa mbere mu kwiruka metero 3000, mu cyiciro cy’abagore tariki ya 4 Kanama 2021, akaba ari we munya Uganda wa mbere wegukanye uyu mudari kuva iyi mikino ya Olempike yatangira mu kwezi gushize.
Amaze kwegukana uyu mudari, Umuyobozi Mukuru wungirije wa Polisi ya Uganda, AIGP Asan Kasingye yamushimiye yifashishije urubuga rwa Twitter, ahita amuzamura mu ntera. Yagize ati: “Wakoze SPC Peruth Chemutai. Mvuze ngo ipeti ryawe rihinduke kuko ubikwiye. Uganda itewe ishema nawe.”
Ubusanzwe Chemutai yari afite ipeti rito muri Polisi ya Uganda, ari ryo Pte (Private). Ubu ni SPC (Special Police Constable). Azamuwe mu ntera nyuma ya mugenzi we Joshua Cheptegei wigeze guca uduhigo tune mu kwiruka. Icyo gihe yari afite ipeti rya IP (Inspector of Police), azamurwa kuri ASP (Assistant Superintendent of Police).
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
