Abantu bane barimo abapolisi batatu, n’umusivili biciwe hafi ya Ambasade y’u Bufaransa mu gihugu cya Tanzania kuri uyu wa Gatatu nk’uko byemejwe n’Igipolisi kivuga ko uwakoze ubwicanyi wari witwaje imbunda nawe yarashwe akicwa.
Igipolisi kiravuga ko abandi bantu batandatu bakomeretse muri iki gitero cyagabwe n’umuntu umwe ku muhanda witiriwe Ali Hassan Mwinyi.
Aya makuru yemejwe n’ukuriye ibikorwa bya polisi, Liberatus Sabas, ubwo yavuganaga n’abanyamakuru nyuma y’iperereza ry’ibanze ahakorewe ubwicanyi nk’uko inkuru dukesha The Citizen ikomeza ivuga.
Ibi byabereye mu ihuriro ry’imihanda Kenyatta Road na Kinondoni, aho bivugwa ko umwicanyi yegereye abapolisi akabarasa. Uyu muyobozi wa polisi ariko aravuga ko iki gikorwa ntaho gihuriye n’iterabwoba nk’uko biri kuvugwa ku mbuga nkoranyambaga.
