Gahunda yo kohereza inkingo za Covid-19 za Johnson&Johnson zari zivuye muri Afurika y’Epfo zigiye koherezwa mu Burayi zahagaritswe nk’uko byatangajwe n’intumwa ya Afurika Yunze Ubumwe, Strive Masiyiwa, kuri uyu wa Kane.
Umuyobozi mukuru w’Ishami ry’Umuryango w’Abibumbye ryita ku Buzima, Tedros Adhanom Ghebreyesus, mu kwezi gushize yari yatangaje ko yatangajwe no kumva izi nkingo zigiye kuva muri Afurika , ahantu umubare munini utarabona inkingo, zikajya mu Burayi, aho abenshi bamaze gukingirwa.
Icyo gihe Komisiyo y’u Burayi yasobanuye ko ari amasezerano y’agateganyo, mu gihe J&J ntacyo yatangaje igihe yavuganaga na Reuters.
Inkingo zari zapakiwe n’umufatanyabikorwa wa J & J wo muri Afurika y’Epfo, Aspen (APNJ.J) zari zamaze koherezwa mu Burayi zasubijwe inyuma nk’uko byatangajwe na Masiyiwa mu kiganiro n’abanyamakuru cyateguwe n’Ikigo gishinzwe kurwanya indwara cya A.U kuri uyu wa Kane.
J&J yari yapakiye doze miliyoni 20 z’inkingo zigiye mu Burayi, aho Masiyiwa yavuze ko kugirango zihagarikwe byagizwemo uruhare na Perezida Cyril Ramaphosa ndetse na Perezida wa Komisiyo y’u Burayi, Ursula von der Leyen.
Mu masezerano gifitanye na Johnson&Johnson, ikigo cya Aspen gitumiza uruvange rw’imiti ikorwamo inkingo muri iki kigo cyo muri Amerika kikazitunganya kikanazifungira muri Afurika y’Epfo.
J&J ifite amasezerano y’ubufatanye na Afurika y’Epfo yo gutanga miliyoni 31 z’inkingo n’amasezerano atandukanye ifitanye na AU ya doze miliyoni 220 z’inkingo.
