Umupolisi wa Kenya w’ipeti rya Constable ukorera ku cyicaro gikuru cya Polisi i Nairobi yatawe muri yombi akekwaho gushaka kugurisha imbunda irimo amasasu 15.
Muri raporo yujurijwe kuri sitasiyo ya Polisi ya Naivasha, OB nimero 3/28/12/2021, umupolisi yari afite umugambi wo guhura n’umukomisiyoneri, bivugwa ko yari kumufasha kugurisha iyo mbunda yo mu bwoko bwa pistolet.
Kugurisha byagombaga kubera muri Craft Yard Club i Naivasha, mu Ntara ya Nakuru.
Ariko nk’uko tubikesha Standardmedia.co.ke, uwo wari guhuza ugurisha n’ugura yari yabimenyesheje polisi itegura umutego.
“Umupolisi yageze muri Craft Yard Club [mu ijoro ryo ku wa mbere]. Yari muri taxi ya Nissan Note isa nk’ivu, yari itwawe n’umugabo w’imyaka 38, utuye i Ruiru, mu Ntara ya Kiambu. Muri iyo modoka kandi, harimo umugore w’imyaka 30, utuye i Ruaka, mu Ntara ya Kiambu, ”ibi bikaba byavuzwe muri raporo ya polisi.
Polisi yaje gufata pistolet yo mu bwoko bwa CZ ifite nimero KE-KP F1948 yuzuye amasasu 15 ya 9mm. Hagaruwe kandi andi masasu 25 yari ku ruhande, ikarita y’ikigo cy’igihugu gishinzwe imicungire y’ibidukikije (NEMA), terefone ebyiri za Samsung na terefone ya Redmi.
Abantu batatu bakekwaho icyaha bafashwe bajyanwa kuri sitasiyo ya Polisi ya Naivasha, aho bafungiye mu gihe iperereza rigikomeje.
