Perezida wa Mozambique akanaba Umugaba w’Ikirenga w’Ingabo na Polisi bya kiriya gihugu, Filipe Nyusi, yirukanye ku mirimo Timóteo Bernardo wari Umuyobozi Mukuru wungirije wa Polisi.
Perezida Nyusi yamusimbuje Fernando Francisco Tsucana wahoze ari Umuyobozi wungirije w’Ishuri Rikuru rya Polisi ya Mozambique ry’Ubumenyi (ACIPOL), nyuma yo kumuzamura mu ntera akamuha ipeti rya Deputy Commissioner of Police.
Perezida Filipe Nyusi mu zindi mpinduka yazamuye mu ntera Brig Eugénio Augusto Roque wahoze akuriye umutwe w’abasirikare bashinzwe kumurinda (Casa miltar) amugira Maj Gen, yongera kumugira umuyobozi w’uriya mutwe.
Yasimbuye Tiago Alberto Nampele wagizwe umuyobozi mu ishami ry’Ingabo za Mozambique zirwanira ku butaka.
Mu rwego rushinzwe Serivisi za gisivile Perezida Filipe Nyusi yashyizeho Ezequiel Isac Muianga nk’umuyobozi warwo asimbuye Messias André Niposso.
Perezida wa Mozambique yanazamuye mu ntera ba Colonel Estêvão Francisco, Ricardo Armando Eugénio Macuvele, Omar Nalá Saranga, Francisco Maurício Assane, na Leonardo da Graça Dimas abagira ba Brigadier na ho Captain mu ngabo zirwanira mu mazi Bernardo Estêvão Nchokomala amuha ipeti rya Commodore.
