Minisitiri w’umutekano w’imbere wa Uganda, Maj. Gen. Kahinda Otafiire yanenze inzego z’ubutabera by’umwihariko Polisi y’igihugu zifunga zitabanje gukora iperereza ryimbitse.
Uyu muyobozi yavuze ko hari ubwo Polisi isanzwe ifite mu nshingano ubugenzacyaha ihabwa amakuru, ikihutira guta muri yombi mbere yo gukora iperereza, yemeza ko batanu mu icumi (5/10) bafungwa kandi ari abere.
Muri ubu butumwa bwe yatangarije mu kiganiro yagiranye n’abapolisi kuri sitasiyo ya Jinja ku wa Kabiri, Minisitiri Otafiire yagize ati: “Nakiriye amaganya menshi y’abantu bafungwa hatanje kubaho iperereza riboneye. Mwakira ibirego, mbere yo gukora iperereza ikintu cya mbere mukora ni ukwihutira gufunga. Birasa n’aho 5 mu 10 mufunga baba ari abere. Murafunga hanyuma mugakora iperereza.”
Minisitiri Kahinda yamenyesheje Umuyobozi Mukuru wa Polisi ya Uganda, IGP Martin Okoth Ochola ko arambiwe kumva aya maganya y’abafungwa barengana, amutuma kubwira abapolisi ayobora kuzajya bafunga babanje gukora iperereza.
Yagize ati: “Bwana IG, bwira aba bapolisi kwikosora. Mugomba gukora iperereza hanyuma mugafunga. Mukore iperereza hanyuma mubone gufunga. Ubwire abo bantu ko ndambiwe ifungwa ridakurikije amategeko no gufungwa nabi. Iyo mubikora, ntabwo muba mwica itegeko gusa, ahubwo muba mukora n’icyaha cyo gukoresha nabi ububasha. Muba mukoresha ububasha bwanyu mu kubabaza abarengana.”
Ibi yabisubiyemo mu butumwa yashyize ku rubuga rwa Twitter kuri uyu wa 8 Ukwakira 2022, agira ati: “Ntabwo ukekwa wese ari uko aba ari umunyabyaha. Kwihutira gufunga abantu hatabanje kubaho iperereza ryimbitse nta bunyamwuga burimo.”
Uyu muyobozi atanze ibwiriza mu gihe hakomeje kugaragara dosiye z’abantu bamara igihe bafungiwe muri kasho na za gereza, nyuma ubutabera bugasanga ibyo baregwa bidafite ishingiro, bakarekurwa.
