Abarwanyi b’umutwe w’iterabwoba wa ADF binjiye muri Uganda bavuye mu birindiro byabo mu burasirazuba bwa Repubulika ya Demukarasi ya Congo (RDC).
Umunyamakuru Canary Mugume wibanda ku nkuru zicukumbuye yatangaje ko abarwanyi ba ADF bambutse umugezi wa Semuliki utandukanya RDC na Uganda mu ijoro, binjira mu gace ka Bweramule mu karere ka Ntoroko.
Aya makuru yemejwe na Depite Rwemulikya Ibanda uhagarariye akarere ka Ntoroko mu nteko ishinga amategeko, avuga ko abaturage bo muri aka gace biganjemo abagore n’abana bahise bahungira mu karere k’abaturanyi ka Fort Portal.
Uyu mudepite aravuga ko hari abaturage bishwe n’abakomeretse, gusa imibare ntabwo iratangazwa.
Umuvugizi wa UPDF, Brig. Gen. Felix Kulayigye, yemeje ko koko abarwanyi ba ADF bari hagati ya 20 na 30 bagabye iki gitero. Ati: “Abarwanyi ba ADF bari hagati ya 20 na 30 mu ijoro ryakeye bambutse umugezi wa Semuliki, binjira muri Kyanja mu karere ka Ntoroko.”
Yakomeje avuga ko imirwano ikomeje, kandi ngo UPDF imaze kwica abarwanyi 11 ba UPDF. Ati: “Ubutasi bwacu bwabimenye, kandi bakumiriwe. Imirwano irakomeje kugira ngo aka gatsiko gahashwe mu buryo bugaragara. 11 muri bo bamaze kwicwa.”
Brig. Gen. Kulayigye yasezeranyije abatuye muri Uganda ko aza kubaha amakuru arambuye kuri iki gitero.
