Pasiteri Niyonzima Jean Damascene ukomoka mu yahoze ari Komini Kinyami muri Perefegitura ya Byumba, yatangaje ko yabangikanyaga umurimo w’ivugabutumwa no gukorera umutwe witwaje intwaro wa FDLR urwanya ubutegetsi bw’u Rwanda.
Uyu mushumba bigaragara ko akuze kuri uyu wa 13 Ukuboza 2022 yasobanuriye abasirikare ba M23 bamufite ko yavuye mu Rwanda mu mwaka w’1994, ajya muri Repubulika ya Demukarasi ya Congo (RDC).
Abajijwe impamvu ari kumwe n’abarwanyi ba FDLR, Niyonzima yasobanuye ko yahaga amakuru uyu mutwe witwaje intwaro. Ati: “Njyewe ndi Pasiteri ariko mbere natangaga amakuru iyo babaga bayambajije. Navukiye i Kinyami, navuyeyo icyenda na kane (1994). Nari Assistant Bourgmestre, Titulaire yitwaga Nyakamwe.”
Pasiteri Niyonzima yatangaje ko ashaka gufashwa gutaha mu Rwanda. Ahuje icyifuzo na bagenzi be barimo: Uwase Diane, Nzamwitakuze Consolate, Ikuzwe Daniel na Nyiramahirwe Espérance; bose babaga mu gace ka Tongo.
