Umutwe witwaje intwaro wa M23 urashinja ingabo za Repubulika ya Demukarasi ya Congo (RDC) kugaba igitero ku birindiro byawo biherereye mu gace ka Bwiza kari muri teritwari ya Masisi.
Perezida wa M23, Bertrand Bisimwa, ni we wemeje aya makuru, aho yagize ati: “Twamaganye kurenga ku guhagarika imirwano kw’ihuriro ry’ingabo za Leta zagabye igitero ku birindiro byacu muri Bwiza, ahahungiye abaturutse muri Kitshanga.”
Bisimwa yibukije ingabo za RDC ko kugaba iki gitero mu birindiro bya M23 ari igikorwa cyo kurenga ku byemezo byafashwe n’abakuru b’ibihugu byo mu karere, bahuriye i Luanda muri Angola tariki ya 23 Ugushyingo 2022.
Iki gitero kigabwe nyuma y’aho kuri uyu wa 15 Ukuboza, Perezida wa RDC, uw’u Burundi n’uwa Angola bahuriye mu nama i Washington DC muri Leta zunze ubumwe za Amerika, bagasaba M23 kubahiriza icyemezo cyo kuva mu birindiro uherutse gufata.
