Umuherwe akanaba umunyapolitiki Moïse Katumbi, yatangaje ko aziyamamariza kuyobora Repubulika Iharanira Demokarasi ya Congo mu matora y’Umukuru w’Igihugu ateganyijwe mu mwaka utaha wa 2023.
Katumbi unasanzwe ari Perezida w’ikipe y’umupira w’amaguru ya Tout Puissant Mazembe, yatangaje ko aziyamamaza kuri uyu wa Gatanu tariki 16 Ukuboza 2022.
Hari mu kiganiro uyu mugabo wahoze ari Guverineri w’Intara ya Katanga yagiranye na Radiyo Mpuzamahanga y’Abafaransa (RFI) cyo kimwe na Televiziyo ya France 24.
Ni nyuma yo gutangaza ko avuye mu ihuriro rizwi nka Union Sacrée rigizwe n’amashyaka amaze igihe ashyigikiye ubutegetsi bwa Perezida Félix Antoine Tshisekedi.
Yagize ati: “Ndi umukandida, kubera ko ubuzima muri Congo kuri ubu ari imvururu, bityo akaba ari ngombwa ko ndokora abaturage bari mu bibazo.”
Katumbi yunzemo yisunze ubunararibonye afite, kuri ubu ashyize imbere kubaka bundi bushya Igisirikare cya Congo Kinshasa (FARDC), inzego z’umutekano ndetse n’ibikorwa remezo.
Moise Katumbi abaye umuntu wa gatandatu wemeje ko aziyamamariza kuyobora Repubulika Iharanira Demokarasi ya Congo, nyuma ya Félix Antoine Tshisekedi Tshilombo usanzwe ayobora iki gihugu cyo kimwe na Martin Fayulu bahatanye mu matora yo muri 2019.
Abandi barimo Matata Ponyo wahoze ari Minisitiri w’Intebe wa RDC, Frank Diongo wahoze ari umudepite mu nteko ishinga amategeko y’iki gihugu cyo kimwe na Jean Claude Baende wahoze ari Guverineri w’Intara ya Équateur.
