Mu rugo rw’umupolisi w’Umurundi witwa Vyankandondera Thérence ruherereye mu gace ka Mwaro, komini Makebuko mu ntara ya Gitega hafatiwe ibikoresho by’igisirikare n’igipolisi birimo imyambaro n’inkweto.
Ibiro by’intara ya Gitega byemeje aya makuru kuri uyu wa 21 Ukuboza byerekanye amafoto y’impuzankano y’igisirikare, iy’abapolisi ndetse n’imiguro enye y’inkweto zizwi nka ‘butini’.
Byasobanuye kandi ko uyu mupolisi yafatanwe ibindi birimo imifuka 53 y’isukari, imifuka 81 y’ifumbire ndetse na moto ya TVS EA 785 itagira ibirango.
Byagize biti: “Imifuka 53 y’isukari, imifuka 81 ya Fomi Imbura, imyambaro y’igipolisi n’igisirikare itandukanye hamwe na moto TV EA 7585 itagira ibiyiranga ni byo byafatiwe ku rugo rw’umupolisi Vyankandondera Thérence mu gace ka Mwaro Mwavuvu, Komini Makebuko i Gitega.”
Igikorwa cyo gusaka urugo rwa Vyankandondera cyakozwe n’itsinda rigari ry’abapolisi.
