Komanda w’ingabo z’ibihugu bigize umuryango w’akarere ka Afurika y’iburasirazuba zibarizwa mu mutwe wa EACRF uri muri Repubulika ya Demukarasi ya Congo, Lt Gen. Jeff Nyagah, yatangaje ku mugaragaro ko abarwanyi ba M23 bavuye mu gace ka Kibumba.
Umuvugizi wa M23 mu rwego rwa politiki, Lawrence Kanyuka, kuri uyu wa 22 Ukuboza 2022 yatangaje ko abarwanyi babo bemeye kuva mu birindiro bya Kibumba, bakabisigira ingabo zo muri EACRF ziraba zibigenzura mu gihe hategerejwe inzira y’imishyikirano.
Nk’uko byari byitezwe, imbere y’ingabo za EACRF, abo mu zindi nzego ndetse n’abanyamakuru, abarwanyi ba M23 batangiye kuva muri ibi birindiro mu masaa saba (saa sita zo muri RDC), bajyana ibikoresho byabo birimo intwaro.
Umuhango wo gusohoka muri ibi birindiro wayobowe na Lt Gen. Nyagah, maze asaba Abanyekongo bari barahunze aka gace [abari mu nkambi ya Kanyaruchinya n’abandi] gusubira mu ngo zabo, abamenyesha kandi ko umuhanda wa Goma-Rutshuru ufunguye guhera uyu munsi.
Yagize ati: “Ndagira ngo mbifurize iminsi mikuru myiza, tunasaba abaturage bahunze zone ka Kibumba, agace karatekanye, turabasaba kugaruka mu rugo. Turanasaba ubuyobozi bwa M23 gukomeza kugaragaza ubushake kandi dukomeze gukorana bijyanye n’itangazo rya Luanda.”
Perezida wa M23, Bertrand Bisimwa, mu gitondo cy’uyu munsi yatangaje ko afite icyizere ko nyuma yo kuva muri Kibumba, abahunze barimo abari Kanyaruchinya barasubira mu ngo zabo, bagatwara ibiribwa byo kuzarya mu minsi mikuru bakoresheje umuhanda wa Goma-Rutshuru.
Aho abarwanyi ba M23 berekeje ntiharamenyekana, gusa ikizwi ni uko abakuru b’ibihugu byo mu karere bateraniye i Luanda muri Angola tariki ya 23 Ugushyingo 2022, babasabye gusubira mu birindiro bahozemo ahaherera mu gice cya Sabyinyo, gurupoma ya Jomba muri teritwari Rutshuru.
