Ikipe ya Rayon Sports y’abari n’abategarugori ikomeje gutanga isomo rya ruhago muri shampiyona y’icyiciro cya kabiri, yanyagiye Nyagatare FC ibitego 16-0.
Iyi kipe yaherukaga kunyagira Gatsibo WFC ibitego 16-0, yari yakiriye Nyagatare WFC ku kibuga cyo mu Nzove mu mukino wa gatatu wa shampiyona y’icyiciro cya kabiri.
Ni umukino wo mu tsinda B amakipe yombi aherereyemo.
Iminota 45 y’igice cya mbere cyawo yaranzwe n’imvura y’ibitego, dore ko yarangiye Rayon Sports itarinjizwa igitego na kimwe iri imbere n’ibitego 9-0. Byari mbere y’uko izi nkumi z’umutoza Sacha Dusange zitsinda ibindi bitego birindwi mu gice cya kabiri cy’umukino.
Rutahizamu Imanizabayo Florence yatsinze ibitego birindwi wenyine muri uyu mukino, ahita yuzuza ibitego 13 amaze gutsinda mu mikino itatu yonyine amaze gukina.
Abandi banyeganyeje inshundura muri uyu mukino barimo Uwanyirigira Sifa watsinze ibitego bitatu, uwitwa Scolastique watsinze bibiri nyuma yo kwinjira mu kibuga asimbura, Uwase Andersene watsinze kimwe, Niyonkuru Chance watsinze kimwe, Uwiringiyimana Rosine watsinze kimwe cyo kimwe na Derice.
Gutsinda uyu mukino byatumye Rayon WFC ikomeza kuyobora itsinda B n’amanota icyenda ku cyenda.
Mu mikino itatu iyi kipe imaze gukina imaze kwinjiza ibitego 33, mu gihe nta kipe n’imwe irabasha kwinjiza igitego mu izamu ryayo.
