Umutwe wa CMC-Nyatura urigamba kwica abarwanyi 13 ba M23, nyuma y’imirwano ikomeye iheruka gusakiranya iyi mitwe yombi.
Ku wa Kane tariki ya 29 Ukuboza ni bwo imirwano yasakiranyije Nyatura na M23, ahitwa Mudugudu ho muri Groupement ya Bwito muri Teritwari ya Rutshuru.
Ni imirwano yari yatangiye ku gicamunsi cyo ku wa Gatatu tariki ya 28 Ukuboza 2022.
Umutwe wa Nyatura ni umwe mu yimaze igihe ufatanya n’Ingabo za Congo Kinshasa (FARDC) mu mirwano zimaze igihe zihanganyemo n’umutwe wa M23.
Mu mirwano yo mu duce dutandukanye cyakora cyo hari ubwo biba ngombwa ko abarwanyi ba Nyatura, Mai-Mai na FDLR ari bo bagiye guhangana ku rugamba na M23, mu rwego rwo kugerageza kuyivana mu duce dutandukanye bigaruriye.
Ni M23 na yo yagiye ikubita ahababaza iyi mitwe, dore ko inayishinja gukorera ubwicanyi abaturage b’abasivile.
CMC-Nyatura biciye mu witita Gen. Dominique Ndaruhutse uyiyobora, yatangaje ko “Imana yabaye ku ruhande rwabo” muri iriya mirwano, kuko ngo bayiciyemo abarwanyi 13 ba M23.
Ndaruhutse yavuze ko abarwanyi batatu bonyine ba Nyatura ari bo biciwe muri iyo mirwano, n’ubwo aya makuru bigoye kuyagenzura.
Amakuru avuga ko imirwano iri no kubera mu bice bya Tongo na Bishusha, ibice byombi byo muri Groupement ya Bwito mu Rutshuru.
Ni uduce ku wa Gatatu ushize bivugwa ko twabereyemo indi mirwano ikomeye hagati ya M23 na FARDC. Ni imirwano yamaze iminsi ibiri.
