Ikigo cy’Igihugu gishinzwe Ibizamini n’Ubugenzuzi bw’Amashuri (NESA), cyatangaje gahunda y’uko ingendo z’abanyeshuri bitegura kujya gutangira igihembwe cya kabiri iteye.
NESA yatangaje ko abanyeshuri bagomba gutangira gusubira ku ishuri tariki ya 05 Mutarama 2023.
Uwo munsi hazagenda abanyeshuri biga mu turere twa Huye na Nyaruguru two mu aajyepfo y’u Rwanda; abo mu twa Rubavu na Nyabihu mu Burengerazuba; abo mu twa Musanze mu Majyaruguru ndetse n’aba Rwamagana na Kayonza mu ntara y’Uburasirazuba.
Bukeye bwaho tariki ya 06 Mutarama hazagenda abanyeshuri biga mu turere twa Muhanga na Nyamagabe mu Majyepfo, utwa Rulindo na Gakenke mu Majyaruguru, Karongi na Rutsiro mu Burengerazuba ndetse na Ngoma na Kirehe mu Burasirazuba.
Ku wa Gatandatu tariki 7 Mutarama 2023 hazagenda abiga mu turere twa Nyanza na Kamonyi mu Majyepfo, Gicumbi mu Majyaruguru, Nyamasheke na Rusizi mu Burengerazuba ndetse na Gatsibo na Nyagatare mu Burasirazuba.
Ku Cyumweru tariki 8 Mutarama 2023 bwo hazagenda abanyeshuri biga mu turere twa Nyarugenge, Gasabo na Kicukiro mu Mujyi wa Kigali, Gisagara na Ruhango mu Ntara y’Amajyepfo, abo mu ka Burera mu Majyaruguru, abo mu Ngororero mu Burengerazuba ndetse na Bugesera mu Burasirazuba.
NESA yaboneheho ababyeyi b’abanyeshuri kubahiriza ingengabihe yatanzwe, kandi bakabazindura kugira ngo bagere ku ishuri hakiri kare.
Ababyeyi kandi basabwe guha abana amafaranga y’urugendo azabageza ku ishuri.
Abashinzwe Uburezi mu turere no mu mirenge na bo basabwe gukurikirana igikorwa cyo gusubiza abana ku ishuri, bakanamenya ko abayobozi b’amashuri babakiriye ku gihe.
Biteganyijwe ko abanyeshuri bazahagurukira i Kigali cyangwa abahanyura berekeza mu zindi ntara bazafatira imodoka zibajyana ku ishuri kuri Stade ya Kigali i Nyamirambo.
