Urukiko rw’Ibanze rwa Kicukiro kuri uyu wa Kabiri rwahanishije uwitwa Bagirishya Emmanuel Moïse Frw miliyoni imwe, nyuma yo kumuhamya icyaha cyo gukomeretsa no kwica bidaturutse ku bushake umunyamakuru Ntwali John Williams.
Ku wa 31 Mutarama 2023 Bagirishya yari yagejejwe imbere y’ubutabera akurikiranyweho icyaha cyo kwica umuntu bidaturutse ku bushake.
Icyo gihe ubushinjacyaha bwasobanuye ko uyu mushoferi yagize uruhare mu rupfu rw’umugenzi wari utwawe kuri moto na Munyagakenke ari we Ntwali John Williams wahise witaba Imana.
Ntwali wari umwanditsi mukuru w’ikinyamakuru The Chronicles Polisi y’u Rwanda yatangaje ko yazize impanuka yabaye ku wa 17 Mutarama 2023 Saa Munani n’iminota 50 z’ijoro.
Ubushinjacyaha bwagaragaje ko uyu mushoferi yagize uburangare no kugendera ku muvuduko wo hejuru, ibyatumye agonga moto yari itwaye uriya munyamakuru.
Bagirishya mu kuburana kwe yari yemeye icyaha ndetse anasaba imbabazi, kuko impanuka yatumye Ntwali John Williams apfa yaturutse ku burangare n’umunaniro yari afite muri iryo joro.
